由於天生十分惹蚊，小時候屋企人已經教我用花露水驅蚊，到依家仍覺得比驅蚊機防蚊貼更有效驅蚊，
花露水驅蚊功效可維持約三、四小時，如果已經俾蚊咬咗，亦可以搽花露水消毒&止痕。

以我經驗所得，其實用邊隻花露水都可以有效驅蚊，效果差不多，
而各牌子花露水嘅香味亦各有不同，所以買花露水只要揀支你鍾意嘅香味就得。
我通常用林文煙，雙妹嚜&蝴蝶牌，由於覺得用噴嘅方法最好，所以我多數會入落噴樽。
其實雙妹嚜有出噴樽裝 (100ml)，價錢同玻璃樽裝差不多，但份量比玻璃樽裝少一半，唔化算，
而且個噴樽又唔係靚，所以寧願去sasa/卓悅買啲幾蚊個嘅噴樽，再自己倒花露水入噴樽。

林文煙嘅香味最清，香味亦散得較快，最啱用嚟噴身，噴多咗都唔會好濃味，鍾意淡香味嘅人啱晒。

雙妹嚜嘅香味清得嚟比林文煙濃啲啲，香味持久度亦比林文煙耐，以我所見，亦係最多人用，
如果只可買一支，我都會揀雙妹嚜，用嚟噴身的話，最緊要適可而止，噴得太多香味會有啲俗，
我用雙妹嚜喺屋企周圍噴，噴落布梳化、布餐椅、窗簾 & 地氈，臨瞓前仲會噴落被。

蝴蝶牌嘅香味最濃，香味持久度亦幾耐，不過我對呢隻味麻麻地，
但由於價錢最平，所以會洗地時用，每次倒少少入水再拖地即可。

右：林文煙 (美國製) $30/221ml
中：雙妹嚜 (香港製) $29/200ml
左：蝴蝶牌 (中國製) $15/195ml
於藥房有售