【SUN特搜小組報道】今年是雙春兼閏月，不少情侶都趕緊在年底拉埋天窗，有準新娘為以最佳體態示人，不惜依照網上流傳的「低卡」、標榜一個月可減四十磅的減肥餐單，極速「餓瘦」。早前英國就有兩名準新娘因每日攝取極低卡路里，導致酮酸中毒和心臟衰竭送命。由於大部分減肥餐熱量過低，本港醫學界警告減肥一族，過度節食會令身體產生有害物質，分分鐘「餓瘦」變「餓死」。

「我要結婚喇，點樣可以極快減到肥呢？」不少婚期將至的準新娘，都急於在網上尋求最快的減肥餐單，但同類餐單極多，如低卡餐、明星餐、新娘餐、生果餐甚至是勁食餐，部分餐單強調只要依照進食，更可「五日減五磅」，甚至「兩個月減五十二磅」，誘人的瘦身效果，令不少準新娘蠢蠢欲試。

不少新人趕緊趁雙春兼閏月拉埋天窗，準新娘更希望以最佳狀態示人。

不少新人為留下最美一刻，進行地獄式減肥。 資料圖片

咖啡因助排水減唔到肥

究竟哪些餐單可達極速減肥的效果？記者將七份坊間較為知名及受歡迎的餐單，交給營養師分析，發現只有兩款餐單算合格，其餘都極不健康，不能減脂肪，只能達到排水減磅的錯覺，實際「減唔到肥」，最大問題是餐單食物款式甚為局限，減肥隨時會演變成厭食或暴食症。

其中一款明星減肥餐，規定每餐要飲一杯咖啡或茶，最豐富的一餐午餐只有半杯魚分量，晚餐僅可進食少許提子、香蕉、兩片蜜瓜，再加兩片肉等，分量少得驚人。香港進食失調康復會註冊營養師文小燕指出：「呢個餐好多咖啡因，只能幫助排水，熱量好低，唔夠碳水化合物，減唔到肥。」

為了達到纖瘦身材，不少女士會單以進食生果減肥。

文小燕指出，單靠食肉減肥可引致高脂肪、高血脂、心臟病和中風等毛病。

戒糖戒澱粉質搞出胃病

另一款明星餐單則規定每日進食約兩種食物，第一日全日三餐，總共只可吃半個西瓜或蜜瓜，其後每日食量遞增，甚至可以任食西生菜和牛扒。文小燕認為：「呢個餐單好極端，因每日只可食一、兩樣嘢，分量又唔均勻，而且好少飯，跟足七日會營養不良。」最大問題是該餐單規定其中一日要喝大量水，但其實人體平均每日都應該喝六至八杯水。

至於生果減肥餐單，則要減肥人士每餐食西柚，配以少許肉類和疏果；其餘兩款餐單，分量算是較多。勁食餐則可以任食餐單中指定食物，包括各款肉類、沙律和蔬菜等。雖然食量增加，但文小燕仍指不理想，「餐單要求減肥人士戒糖及戒澱粉質等，但卡路里過低，有時一日只係得幾百個，咁食法會無力、手軟腳軟，甚至搞出胃病。即使身體水分減少，體重稍後都好快會反彈。」

碳水化合物過少可致命

其實，不少強調「食肉、唔食澱粉質」的餐單，危機重重。「食肉減肥法會引致高脂肪、高血脂，心血管毛病、心臟病和中風等。而身體需要葡萄糖去代謝廢物，咁樣食法唔能夠消耗脂肪，若長期無吸取碳水化合物，輕則會有口氣，重則令身體產生一種叫做酮嘅物質，可導致死亡。」

醫學會會長謝鴻興表示，「進食低過自己消耗量嘅減肥餐，係想餓瘦自己，但進食食物嘅碳水化合物太少，身體就會分解脂肪產生熱量，不過亦會產生酮，令血液嘅酸性提高甚至中毒，可導致呼吸急促、心跳紊亂、頭暈甚至昏迷。」他指出，類似低卡、極速減肥法，成效難持久，不值得亂試。

5呎6吋減剩60磅唔敢照鏡

節食減肥，失敗例子很多，瑪莉（化名）在數年前因節食減肥而瀕臨「餓死」邊緣，她憶述痛苦經歷，後悔莫及：「十五、六歲嗰年，我五呎六吋高、一百一十磅，覺得自己有啲肚腩，見同學減肥，就『跟風』一齊減。」她由減少食量着手：「計住卡路里嚟減，最初每日吸取千二個卡路里，但後來愈嚟愈少，只係吸取幾百個卡路里，甚至覺得飲水都會肥，後來仲演化到每餐只係食一個麥包，覺得咁樣會『安全』啲，唔會肥。」

本身參加田徑長跑運動的她，減肥期間更堅持每日跑步一個鐘，短短兩三個月已輕了十磅。看似減肥成功，沒料到已減出禍。

「因為食得太少，後來咩都唔想食，患咗厭食症，仲先後入過三次醫院接受治療，最嚴重嘅時候得番六十幾磅，唔敢照鏡，好驚出街見人，依家好番，體重上升番，至知道有健康至稱得上靚。」

節食過度隨時患上厭食症，令身體嚴重營養不良。 資料圖片

英兩準新娘減肥送命

在英國，已經先後有兩名年輕準新娘，為了婚禮而地獄式減肥，雖在短期內減少四十至八十磅，但是同時因而導致嚴重缺乏糖分，心律不正，賠上性命。

年輕母親安德森，為了在訂婚派對展示美好身段，自創地獄式湯水減肥法，拒絕進食各樣固體食物，每日只喝湯和水，原本重二百一十磅的她，短短十四星期激減了八十二磅，身段雖美麗了，但身體嚴重缺乏糖分，酮酸中毒致死。

另一名重達二百四十四磅的英國準新娘克洛威，去年也是想在婚禮展示最好狀態，決定婚前地獄式減肥，每日只吃小食和飲湯水，一日僅攝取五百三十卡路里，不久後昏迷家中送院不治，當局指她死於心律不正。

安德森及克洛威，因為進行婚前地獄式減肥送命。 資料圖片

克洛威

太陽報