蘋果日報

娛樂圈大氣候近日轉好，港片抬頭之餘，又掀起宮心毒唔睇唔安樂的煲劇熱潮，連帶演唱會也興起，於 2010大放光采。 17猛男將在首季搶閘開騷，當中包括處男踩上紅館台板的人氣組合 Mr.；情人節登場的張敬軒；同門大師兄陳奕迅（ Eason）則場數最多，以 8場騷稱霸。

近期香港市道復蘇，加上臨近聖誕除夕，娛樂圈事業轉趨興旺，就連演唱會也百花齊放。繼本月底鄭秀文舉行 10場紅館演唱會，全部爆滿致一票難求後，明年首季紅館檔期亦被多間主辦機構爭崩頭，紛紛為旗下歌手開騷銀。

Super Band打頭陣

踏入 2010年，開騷歌手陽盛陰衰，戰狼 17各自踩台表演，當中包括由周華健、羅大佑、李宗盛和張震嶽組成的台灣過江龍 Super Band，四人將於 1月 6日起在紅館舉行一連兩場「縱貫線世界巡迴演唱會 2010香港終點站」打頭陣，之後開騷的是同鄉庾澄慶，另一同鄉陶喆則在灣仔會展演出兩場；香港地頭蟲環球系男將陳奕迅、張敬軒和人氣組合 Mr.，更會在紅館分庭抗禮。

向來唱 live有保證又受歡迎的 Eason，雖然與謝安琪的緋聞連月傳個不停，但對其歌唱事業並無影響，主辦商繼續對他信心十足，暫定於 3月 21日至 28日舉行一連 8場的演唱會，是 17位開騷男歌手之中，舉行場數最多的一位。

至於張敬軒則會在 2月 12日至 14日連開 3場「軒動心弦演唱會」，與觀眾同度西方情人節及農曆新年；而今年彈起、勢必囊括樂壇頒獎禮新人王獎項的 5人 band友 Mr.，也食住上首踏紅館台板，在 3月 3日舉行一場演唱會。

新秀出身的許志安、梁漢文、蘇永康及張衛健就明顯仿 Super Band，以 Big 4為名開騷，日前已宣佈於 3月 12日至 14日舉行 3場紅館演唱會，圖四合一博絕地反彈。

Eason明年 3月將會於紅館開騷，勢再掀起搶飛潮。資料圖片

Super Band去年組成，巡迴東南亞開騷叫好叫座。資料圖片

新組成的 Big 4，也希望在明年紅館騷分一杯羮。資料圖片

軒仔明年情人節舉行的演唱會將邀請緋聞情人上台。

軒仔請關楚耀睇騷

此外，張敬軒昨日到商台宣傳，提到其演唱會食正農曆新年與情人節，問他是否想賺利是錢？軒仔笑言：「都係 o架，不過都諗緊有乜嘢可以回贈畀觀眾。」早前他找來傳斷背的關智斌錄音宣傳演唱會，他說：「我啲歌迷好想佢上台唱歌，到時睇吓得唔得喇。」軒仔又透露已邀請關楚耀到來欣賞，會否上台表演則要看他的意思。

採訪、攝影：葉雪、胡比

17猛男演唱會列表

歌手： Super Band（周華健、李宗盛、羅大佑、張震嶽）
日期： 1月 6日-1月 7日
場數： 2場（紅館）
票價：$580、$480、$280、$180

歌手：庾澄慶
日期： 1月 9日-1月 10日
場數： 2場
票價：$580、$380、$180

歌手：陶喆
日期： 2月 3日-2月 4日
場數： 2場
票價：$680、$480、$280

歌手：張敬軒
日期： 2月 12日-2月 14日
場數： 3場
票價：$680、$480、$280、$180

歌手： Mr.
日期： 3月 3日
場數： 1場
票價：未定

歌手： Big 4（許志安、梁漢文、蘇永康、張衛健）
日期： 3月 12日-3月 14日
場數： 3場
票價：$480、$280、$150

歌手：陳奕迅
日期： 3月 21日-3月 28日
場數： 8場
票價：$480、$280、$150

註：陶喆演唱會於灣仔會展舉行，其他均於紅館開騷。